هذا الفصل العــاشر (ويظهر أنه الأخير) من تجربـتي مع شلمـبرجير Schlumberger
~~ قبل أبدأ هالفصل أحب أشكر كل من شجعني وحفّزني بشكل مباشر أو غير مباشر في كتابة هالتجربة ، وهم: والدتي وغيرها من أصدقاء, وزملاء, ومسؤولين بالجامعة, ومسؤولين ببعض الشركات, واللي وددت أعرفهم من اللي شجعوني في الآسك وغيره, وحتى زوار المدوّنة ، فالاحصائيات اللي تظهرها المدوّنة كانت مشجعة لي حقـيقةً ، ولله الحمد بلغ عدد الزوار 15,674 زائر ، 11,627 من السعودية ، ومن أمريكا 1,781 زائر (ويظهر أنهم مبتعثين) ، والبقية من دول متفرقة (دول الابتعاث + دول عربية) ، فحقيقة هالتنوع كان مشجّع لي لأنه كان يشعرني بالتقدير يوم أنهم يقرأوا لي ، وأشكر كل من صرف من وقته الثمـين لجل يقـرأ تجربـتي المتواضعـة ~~
هالفصـل راح يكون أطول فصل ، لأن بأذكر فيه بعض النقاط اللي ما أمداني أذكرها في الفصـول السابقة، وأيضاً راح يكون منها إعادة كلام كان عبارة عن إجابات على أسئلة جاتني في الكيك أو الواتس أو تويتر ، بالإضـافة لبعض الملاحظات والنصائح ، وأنا حقـيقةً لا أرقى لأن أكون ناصح أو موجّـه وإنما هي نصائح من تجـارب لا أكثر ، وأرجو أنها تفيد.
في السطر الأول فوق قلت بين قوسين "ويظهر أنه الأخير" لأن بانتهائي من آخر سطر من هالفصل أكون قلت كل اللي بالي من اللي أقدر أقـوله ولذلك راح يكون آخر فـصل ، إلّا إذا تنبّهت لشيء أو إذا كثر السؤال عن شيء معيّن فممكن أكتب فصل عنه.
وبما أن هالفصل راح يكون عن أكثر من جانب فكتابته على شكل نقـاط بيكون أفضل ، ونبدأ من البداية بسم الله وعسى أغطّي كل شيء كنت أبي أقوله:
- وجهة نظر :: إذا كنت مهتم بصناعة البترول والغاز فشركات خدمات البترول خيار مناسب (غالباً) في بداية حياتك ، وأقول هالكلام لأن محد تجيه الدنيا على طبق من ذهب ، لا بد الكل يضحّي لجل يتعلم ويكسب (ليس المال فقط) ، والكل من قبلنا ضحّى في فترة من فترات حياته .. أبوي وأبوك وجدي وجدّك وربما أمهاتنا أيضاً بل والأنبياء من قبلهم ، فالكل لازم يضحّي ويكرف شوي لجل يملك في الأخير (سواءً يملك علم أو مال أو وجاهة أو أيّاً كان) ، وهذه هي سـنّة الحـياة ، ومن وجهة نظري أن أفضل فترة تطبّق فيها سنّة الحياة هذه على نفسك هي في فترة العشرينات من عمـرك ، لأنك باقي شاب ما عندك الالتزامات اللي راح تكون منشغل بها في سنّ الـ 40 أو الـ 50.
- على الأقل شلمبرجير أقول عنها هالكلام (ولا أثبـت ولا أنفي عن باقي شركات خدمات البترول لأني ما جربتها): مهما كنت تسمع عن شلمبرجير من مساوئ في باب الكرف والمرمطة تأكّد أن هالأشياء (اللي ينقال عنها كرف ومرمطة) بتضيف لك بأكثر مما تأخذ منك ، ويمكن أكثر ناس يكون هالكلام قريب لقلوبهم هم طـلاب جامعـة الملك فهـد للبـترول والمعـادن وخصوصاً طلاب السنة الأخيرة وخريجيها ، ولا أشبه بالجامعة من شركـات خدمات البترول إلّا شلمبرجير.
- بيكون من الجميل أن تأخذ رضى والديك بالعمل في شركات خدمات البترول لأن هالشركات تغيّبك عنهم لأسابيع عديدة ويكون أخذ رضاهم أحوج إذا كان عقدك معهم خارج دولتك لأن الغياب بيكون أطول ، وأخذ رضاهم يكون ضروري إذا كان عندك فرصة لعمل بديل قريب من والديك. فخذ رضاهم ، وحاول معهم إن ما كانوا راضين ببعدك ، واشرح لهم وعلّمهم وش كثر هالتجربة بتبني فيك وبتضيف لك.
- كل شركة تهتم لجانب معيّن في شخصيّة المتقدّم لها ، اللي يبون باحث واللي يبون مسوّق واللي يبون مهندس حقول نفط وغاز ، فمن خلال السيرة الذاتية وفي المقابلة الشخصية أيضاً أبرز للشركة وأظهر لهم هالجانب اللي هي مهتمّة فيه.
- نصيحة مهمّة جدّاً .. صحيح إن من الجميل تسأل أخوياك المقربين وإخوانك وحتى أمك وأبوك عن عيوبك لجل تعدّلها وتحسّنها وهذا يكون في أي يوم من أيام السنة .. ولكن قبل لا تروح مقابلة شخصية اطلب من المقربين منك يحكوا لك عن ممـيّزاتك وعن الجوانب الجيّدة في شخصيتك لأن صدّقني اللي حولك يشوفوا فيك أشياء جـيّدة أنت ما تشوفها في نفسك .. تماماً مثل العيوب اللي أحياناً تحتاج من ينبهك عليها.
- المعـدّل ليس كل شيء ولكنه من أهم الأشـياء ، بمعنى: اهتم بمعدّلك ولا تنسى تطوّر شخصيتك وتبـني فيها ، سواءً بمشاركات فاعلة في الأندية الطلابية وتحمّل مسؤوليات كبيرة فيها, أو أعمال تطوعية, أو عضويات المجالس الاستشارية واللجان التـنفيذية بالجامعة, وغيرها من الأنشطة داخل وخارج الجامعـة ، وكل مجال من الأنشطة اللي ذكرتها فوق وغيرها راح يضيف لك شيء في شخصيتك تتمـيّز به عن طالب من قـاعة الدراسة إلى غرفته ومن غرفته إلى قـاعة الدراسة.
- مقابـلة نائب رئيس الشركة والمدير العام لفرع الشركة بالسعودية والبحرين للمـتدربين والحديث معهم لأكثر من ساعتين والتجاوب مع كل الأسئلة والاستفسارات والحديث ببساطة معهم وغيرها من الأشياء كانت درس لنا كمتدربـين ، وإيجابيات هالشيء كثيرة والمكان مب لحصرها ، ولكن ذكرت هالشيء لجل أقول: بيكون من الجميل لو نستخدم مثل هالأساليب بكرا مع الموظفين اللي نكون مسؤولين عن أعمالهم في الشركة أو المؤسسة اللي نشتغل فيها.
- سواء بالشركة أو بالحياة عموماً ، قبل تتكلم عن الأشياء .. تأكّـد: هل يجوز لك تتكلم عنها أو لا ؟ .
- بـ شلمبرجير وغيرها من الشركات ، لا تكون فيها مجرّد موظف أو متـدرب تخلّص شغلك وتمشي ، بل فكّـر بتطوير العمل واقـترح على رئيسك (إن ما كان من صلاحيتك التعديل) إن كان فيه حاجة ، ولا تستصـغر نفسك حتى لو أنك مـتدرب ، ولا تقعد تسأل نفسك هالسؤال الاستنكاري " هم موظفين ولهم سنين يشتغلون وعندهم خبرة ، فهل أنا أعلم أو أدرى منهم حتى أطوّر من عمل هم يشتغـلوه ؟! " ، أي نعم هم عندهم خـبرة .. واستفـد من خبرتهم ، ولكن أيضاً اطرح أفكارك لتطوير العمل ، فإن كان رأيك صائب .. فخير وبركـة وبتكون أضفت للعمل ، وإن كان رأيك ووجهة نـظرك مجانبة للصواب أو في غير محلّها .. فهذه فرصـة إنك تتعلم منهم وأكيد خلال النقاش بتعرف أشياء عن العمل ما كنت تعرفها قبل إثارتك للنقطة الفلانية.
- شلمبرجير طبعاً مب مكان للمهنـدسين فقط ! ، ففيها الكثير والكثير والكثير من خريجـي الكليّات التقنـية وغالبهم يشتغلون باللابات (المعامل) وسبق وتكلمت عن هالشيء في الفصل السـادس.
- الموظفـين في الشـركة متعـاونين جـدّاً ، بغض النـظر عن الجنسية واللـون والعمـر والدين والمذهب والمؤهل العلمي ، فالكل هناك متعـاون لأبعـد درجـة .. بل لدرجـة ما تتصـوّروها. وبعد تجربـتي (والمثل يقول اسأل مجرب ولا تسأل خبـير .. في إشارة للأخذ بالتجارب) أقولها: "بيـئة العمـل في شلمـبرجير هي بيـئة إيجـــابــية ، وما أحوج الكثير من الشركات والمؤسسـات وبالأخص المؤسسات الحكـومية إلى هـذه البيـئة".
- في الفصـل الثـامن قلت بأنه تتواجد في الفيلد أكثر من شركة لخدمات البترول تستقطبهم أرامكو لمشروعها ، فحاول تخلّي علاقاتك تتجـاوز محيط زملاءك -اللي لابسين مثل لبسك (من شركتك) - إلى الشركاء في العمل على المشروع من الشركـات الثانية ، فلا تخلّي علاقاتك معهم منحصرة في طلبات متعلّقة بالعمل (لأنه مثلاً يصير تواصل كثير بين مهندس الـ MWD والحفّار وقت أخذ القياسات) ، ولا تكون مثل اللي من الـ Unit (مقر العمل) إلى النوم ومن النوم إلى الـ Unit ، بل حاول تصنع علاقة طيبة مع الجميع.
- أيضـاً الفورمان (مسؤول أرامكو ، وهو المسؤول الأول والأخير) لا تكون علاقتك به مجرّد توقيع أوراق (الفواتير وغيرها) أو علاقة عمل بحـتة ، بل ادخل معه وخذ واعطي ، وبيّن له أنك مهتم بأن العمل ما يتأخر عن الخطة وأيضاً خليه يحس بروح البــذل اللي عندك ، ولأنك أنت "وجـه شلمبرجـير" في الفـيلد وأنت الممـثل لها ، فحاول بكل ما تقدر تحافظ على الصورة الحسنة المعروفة عن موظفي الشـركة ، وأيـضاً هالشيء راح يفـيدك إذا صارت مشاكل في العمل ، بل يمكن علاقتك معه تكون من أقوى الأشياء اللي تسـاعدك في أنك تحـتويه إذا بدَرت أخطـاء من قِـبلك وتسببت في تأخير العمل ، وقتها الفورمان من حقه يعصّب وعنده صلاحيات ممكن يتّخذها (مثل طردك من الفيلد) كونه ممثل العمـيل (العميل:أرامكو) ، فبدل ما يجي الـ "Field Service Manager" من مقر الشركة لجل يهوّن المشكلة ويآخذ ويعطي مع الفورمان ويخفف من وقع المشكلة في نفسه بسبب خطأ موظف تابع للشركة .. تكون أنت اللي تقـوم بهالعمـل ، ولا تخلّي الـ "Field Service Manager" يجي بسببك.
- فوق قلت بأنه ممكن تبدر منك أخطـاء تتسبب في تأخير العمل وإيقـافه مؤقـتاً ، غنـيّ عن الذكر أن هالشيء ممكن يبدر من أحد موظفي الشركات الثانية ، فأسوأ شيء ممكن يصـدر منك هو أنك تقول: "بما أن الشغل واقف ومتعطّل ومب بسببنا فخلني أجيب اللابتوب وأشوف لي كم فـلم حتى يستأنفون العمل" ، أي نعم نظاماً غير مُطالب بإصلاح عطل جهاز خاص بشركة الحفر العربية أو هاليبورتن أو غيرها ، ولكن هالحركة جدّاً مسـتفزّة ، ففي الوقت اللي يكون فيه الفورمان مرتفع ضغطه من تعطّل الشغل تكون أنت بكل بـرود قاعد تطالع أفـلام ! ، إن ما قدرت تساعد فعلى الأقـل حسسهم (وخصوصاً الفورمان) أنك مهـتم باللي صـاير ، تمـاماً مثل بيتكم لو صارت فيه مشكلة كبيرة .. فبالتأكيد إن ما قدرت تساعد ما راح تطالع أفلام وتآكل فشار وأهلك واقفين ع المشكلة وحايسـين معها ، على الأقل توقف معهم إن ما كنت مُـبادر.
- على الأقل إن كان الفيلد اللي بتروحه تابع للعضيلية: فتقدر تروح للفيلد بطريقتين ، أو بالأصح تقـدر تروح العضيلية بطريقتين:
- بسيـارة الشركة بعد ما تحجـز لك مقعد في السيارة ، فالشركة عندها سيارات كبيرة (جمس ، فورد اكسبديشن ، وغيرها) تطلع يوميّاً لفروع الشركة اللي قريبة من الحقول مثل العضيلية ومنيفة وغيرها ، فإذا كان موعد طلوعك بكرا أو بعده مثلاً فتطلب حجز مقعد في السيارة وتروح معهم ع الموعد المحـدد ، طبعاً يوقف فيكم بنص الخط تقريباً تشتروا أشياء من المحطة إذا أحد يبي.
- بسـيارتك الخـاصة من بيتك أو من مقر الشركة إلى مقر الشركة في العضيلية.
- وبعد ما توصل العضـيلية (بأي من الطريقتين) ، تروح الفيلد بسيارة الشركة (وغالباً معك مهندسين) ، وسائق الشركة يمر فيكم على الحقول وينزل كل واحد في الفيـلد المُـرسل إليه من قِبَل الشركة.
- أنت مكفول في الفيلد من ناحية السكن والأكل والشرب والمواصلات والإسعافات والعيادة الطبية وغسيل الملابس.
- لا تأخذ معك فلوس كثير وأنت طالع الفيلد ، بس خذ احتياط 200 أو 300 ريال مثلاً ، وممكن تشتري منها أكل خاص لك ، طبعاً ما أقصد أكل أكل .. وإنما شغلات جاهزة (مثل: سنكرس ، كيك ، عصيرات) ما تلقاها في مطعم الفـيلد.
- يوم تروح الفيلد كمتدرب بيكون غالباً فيه اثنين مهندسين ، كل واحد منهم يشتغل 12 ساعة تقريباً ، فيوم رحت الفيلد كنت مخلّي الشفت حقي مع مهندس النهار (كونه غالباً المهندس الأقدم والأعلى قريد ويسمونه "الليد هاند") واللي يداوم من 6 الصبح إلى 6 المغرب ، ولكن رغم أن كلا المهندسين الاثنين من شلمبرجير ونفس الدراسة في مدرسة شلمبرجير ونفس العمل يعملونه إلّا أني لاحظت أنهم يختلفون بطريقة التفكير الهندسي وشرح المشكلة لي وحل المشاكل ، وهالشيء قادني لفكرة جميلة وهي أني أقلب الشفت حقي ويصير من 12 الظهر إلى 12 الليل ، وليس من 6 الصبح إلى 6 المغرب ، والسبب أني أبي أستفيد من الاثنين ، لأن لو قعدت على الشفت من 6 الصبح إلى 6 المغرب معناته ما بستفيد من المهندس اللي يداوم من 6 المغرب إلى 6 الصبح ، فلذلك قسمت الشفت حقي بينهم بالتساوي 6 ساعات مع هذا و6 ساعات مع الآخر ، وكانت والحمدلله فكرة ممـــتــــــازة جدّاً (أوصّيكم تسوونها إذا كان ممكـن).
- حاول تنـمّي في نفسك روح المـواطنة ، باختلاف درجات المواطنة سواءً للوطن, أو مدينتك, أو بيتك, أو جامعتك, أو الشركة اللي تشتغل فيها وغيرها من الأماكن ، واعـتبر هالأماكن تماماً مثل غرفتك الخاصة أو سيارتك اللي بالتأكيد راح تهتم فيها ، فشعور الانتماء للمكان وأن هالمكان يعنيك وأنك جزء منه .. هالشيء راح يدفعك لجل تحسّن من بيئة الكيان اللي تنتمي له وتحل مشاكـله فور حدوثها بدون ما تنـتظر أحد يوجّهك ، وهذا هو الشيء اللي يمـيّز اللي عنده روح المواطنة عن غيره اللي ما يتحرّك إلا إذا أحـد وجـهه أو أمـره.
وبكـذا أكون انتهـيت من حكي تجربـتي ، والحمـدلله الذي بنعمته تتم الصالحات
وأي أحـد عنده إضافة يكتبها بالكومنتس لجل نستفيد
وأي أحد عنده استفـسار أو سؤال فأنا حـاضر باللي أعرفه ، وهذه هي وسائل التواصل:
أخوكـم/ أحمـد الراجحـي
