هذا الفصل الثـامن من تجربـتي مع شلمـبرجير Schlumberger
وهالفصـل راح يكون عن الفيـلد (الحقل)
ولكن قبل نبـدأ بتفصـيل الأعمال في الفيـلد خلنا الحين نتكلم عن الفيـلد عموماً ونخلّي الكلام على شكل نقـاط أفضل ، وبعد كذا نحكي وش صار من أعمـال ونختم بنصائح من تجارب:
- الفيـلد هو الحقل وهو مكـان العمل خارج العمران.
- فوق قلت خارج العمران وما قلت الصحـراء لأن فيه آبار تكون قريبة من المـدن وبالإمكان رؤيتها على جوانب الطرق بين محافظات المنطقة الشرقية ، وتتضح رؤيتها لـيلاً مع أنوار المشروع.
- مثل ما قلنا في الفصـل الأول أن مالك الأرض والبـترول في السعودية هي شركة أرامكـو ، أما شلمبرجـير وغيرها من الشركات كـ وذرفورد وبيكرهيوز وهاليبورتن هي شركات تقـدم خدمات لأرامكـو في مجال صـناعة النفط والغـاز ، وهم أشبه بشركات المقـاولات (البناء).
- وهذا يعني أن على البئر من الممكن (بل غالباً) تتواجد أكثر من شركة ، وأهمهم الشركة اللي تقوم بتوفير منصة الحفر وأدواتها مع البيوت الجاهزة وكل ما يُحتاج إليه من أكل وشرب ومواصلات (أحياناً) وغرف للنوم ولدورات الميـاه وللمـراوش وللمكاتب وأيضاً للشاي والصلاة وعيادة طبـية وغيرها ، والمسـؤول الأول والأخير واللي ينظم بين أعمال الشركات في الفيلد هو شخص مسـمّاه "الفورمان" وهو من أرامكو التي تعاقدت مع هذه الشـركات لتقديم الخدمات لها (لأرامكو).
(صورة للبيوت الجاهزة)
- في النقطة اللي فوق كتبت كلمة "أحياناً" بين قوسين بعد كلمة المواصلات ، وأقصـد فيها أن أحيـاناً يكون فيه سكنين في الفيـلد ، الأول في المنطقة اللي حول البـئر ، والآخر يبعد عن البـئر قرابة 1 كيلومـتر ويكون اسمه السكن الرئيس ، وهالسكن الرئيس في المقام الأول يحتوي على المطبخ ويكون قسمين للمهندسين (وهم قلّة) وللأوبريتورز (وما أحب أسميهم عمال) ونقول اسمهم "المشغّـلين" وهم عادةً أصحاب شهادات الدبلوم وما دون (وهم كثرة مقارنة بالمهندسين) ، وهم في الحقيقة لبّ العمـل ووقـوده وأداتـه ، أيضاً فيه مغسـلة المـلابس وأحـياناً "الجيم" ، وسكن للمهندسين بس عادةً فاضي ، وتكون المواصلات بين هالمنطقتين (الواحد كيلو).
- بالنسبة لي في أول زيارة للفيلد "الفورمان" وجّه بأن أسكن في السكن الرئيس بينما المهندسين غالباً يسكنون في السكن اللي عند البئر ، وكانت عنده وجهة نـظر في ذلك ، عمـوماً هو الآمـر الناهي في الفيـلد وهو المسؤول الأول والأخير مثل ما قلنا.
- مثل ما قلنا المهندسين عادة يسكنوا بالسكن اللي عند البئر وأحد الأسباب ونضرب كمثال: شلمبرجير ترسل اثنين مهندسين كـ MWD Engineers (راجع الفصلي الخامس والسابع ) ، وكل واحد فيهم يمسك 12 ساعة ، فكون الثاني ينام قريب من مكان العمل أفضل في حال طرأ أمر يحتاج دعمه ومسـاندته من أنه يكون نايم في مكان يبعد 1 كيلو تقريباً ويحتاج وسيلة مواصلات تنقله وهاتك يا تأخير.
- جودة السكن تختلف من شركة إلى أخرى ، وما راح أذكر الشركات السيئة ، ولكن أكثر شركة متعـارف عليها أنها 5 نجوم ههههههههههه هي شركة الحفر العربية.
- مب جودة السكن اللي لوحدها تفرق ، ولكن جودة الأكل أيضاً وأشياء أخرى ، حتى التلفزيون بعد يتوفر في شركات وشركات لا <<أنا ما قاعد أحط التلفزيون أو غيره كمعيار لأنه (أي: التلفزيون) وأشياء غيره بالنسبة لي قيمتها مثل قيمة الصفـر ع الشمال ، ولكن أنا هنا أنقل لكم كل شيء بقدر الإمكان ، وكلّن يآخذ من كلامي اللي يشوفه مهم بالنسبة له.
- بالفيلد ما تحتاج ملابس كثير ومحد بيطالعك أصلاً ، 12 ساعة (أو 14 ساعة) بتكون لابس الـ cover all (راجع الفصل الخامس) ، والـ 10 الساعات الباقية أغلبها نوم عشان تتقوى فيها لعمل بكرا.
- تحتاج تأخذ معك أغراضك الشخصية (عاد مب لازم نفصّل) ولكن فيه شيء مهم احرص انه يكون معك وهو موس الحلاقة أو المكينة ، اللحية ممكن تتسبب في هلاكك إذا دخل بسببها غاز الـ H2S إلى القناع اللي ممكن تحتاج تلبسه إذا انبعث هالغاز.
- بيكون جميل لو أخذت معك مصحـف وعادةً الغرف المخصصة للصلاة فيها مصاحف.
- تقدر تأخذ معك لابتوبك بس احرص عليه من السرقة :d
- إذا ممكن يُفضَّل تآخذ معك أكثر من شريحة (ويا حبذا يكونوا اس تي سي وموبايلي) ، لأن ما تدري وش من شركة يكون لها تغطية في مكان عملك وممكن كلهم الثلاث الشركات تشتغل وممكن ولا وحدة
~ نـراكم الفصـل القـادم ~
ومعزومين على حفل تخرجي من جامعة الملك فهـد للبترول والمعادن يوم الخميس 9 أبريل (بعد 10 أيام) بعد صلاة العشاء في الاستاد الرياضي بالجـامعة.
ليست هناك تعليقات:
إرسال تعليق