شلمبرجير # 103

هذا الفصل الثـالث من تجربـتي مع شلمـبرجير Schlumberger

مثل ما قلت بالفصل السابق .. مرّت الأيام وحذفت الترم الثاني فجأة وسافرت أمريكا وهناك فكيت الشريحة السعودية من الجهاز وأخذت رقم أمريكي ورجعت السعودية على الصيفي وطبعاً للأسف ما أقدر أتدرب صيفي بسبب إن متطلبات التدريب فاتتني في الترم اللي حذفته (وآمنت إنه خـيرة من ربي وإن ربي الكريم بيكرمني) ، فقلت أستغل الصيف وأدرس أي مادة واخترت مادة من الهندسة الكيميائية (متطلبة) وبديت الدوام بالجامعة للصيف.

ثالث يوم دوام بالصيفي .. يجيني اتصال من هاتف ثابت وما رديت كنت بالكلاس

بحث عنه بـ "النبمر بوك" وطلع تبع شلمـبرجير .. الصدق تعجبت

دقيت ع الرقم لقيته مشغول ، ركبت الباص ونزلت ع السكن ورجع الرقم يـدق عليّ .. ورديت

الموظف: ألو ، أحمد الراجحي؟

أنا: ايه .. سم ، معك أحمد

الموظف: معك فلان من شركة شلمبرجير .. تذكرني يا أحمد؟

قلت: ايه أذكـرك .. شلون ما أذكرك .. يا هلا والله

الموظف: كيفك يا أحمد؟ ووينك الله يهديك؟ ، أتصل عليك جوالك مغلق.

عاد شرحت له ظـروفي اللي سافرت لجلها وإن هناك كان عندي رقم أمريكي ورقمي السعودي مغلق وإني توّ راجع.

سألني: هاه بتدرّب؟

قلت له: ودّي .. ولكن صعب لأن فيه مواد لازم آخذها قبل التدريب الصيفي وفاتتـني يوم إني بأمريكا.

قال: اها .. طيب متى بتدرّب إن شاء الله؟

قلت له: في صـيف 2014 إن شاء الله.

قال: هاه معنا إن شاء الله؟

قلت له: أكيد إن شاء الله إن قبلتوني.

قال: خير إن شاء الله .

الصدق استانست .. وتذكرت العام الماضي يوم اني كنت أسولف مع موظف وذرفورد (اللي ذكرته في الفصل الثاني) وإنه كان السبب اللي خلاني أرجع لشلمبرجير وأعطي "السي في" لهالشخص.

اللي صار فوق كان في الفصل الصيفي (يونيو 2013) وبأتجاوز بسرعة إلى الترم الثاني من العام التالي (فبراير2014) لأن ما أبي أفصّل واجد ، والتفصيل اللي صار فوق وبالفصل الثاني ذكرته لأن هالنقاشات أكسبتني ثقة في نفسي وعرفـتني ما أملك ، وأكـرر وأقول: نصيحة مهمّة جدّاً .. صحيح أنه من الجميل تسأل أخوياك المقربين وإخوانك وحتى أمك وأبوك عن عيوبك لجل تعدّلها وتحسّنها وهذا يكون في أي يوم من أيام السنة .. ولكن قبل لا تروح مقابلة شخصية اطلب من المقربين منك يحكوا لك عن ممـيّزاتك وعن الجوانب الجيّدة في شخصيتك لأن صدّقني اللي حولك يشوفوا فيك أشياء جـيّدة أنت ما تشوفها في نفسك .. تماماً مثل العيوب اللي أحياناً تحتاج من ينبهك عليها.

في النصف الأول من الترم الثاني .. كان بداية موسم التقـديم على الشركـات وكان افـتتاح الموسم بشركة "أرمكـو" ، فقبل بدء التقديم على شلمبرجير بقرابة شهر كان بيقفل التقديم على أرامكو .. وللأسف كان من ضمن شروط الجامعة إن اللي ينقبل في أرامكو لازم يكمّل معها وما راح تقبل الجامعة انتقـاله إلى شركة أخرى للـتدريب.

فوق قلت كلمة "للأسف" .. وقلتها لأن ما كنت أبي أتدرب في أرامكو ولكن أيضاً ما أبي أخسرها في حال عدم قبولي في شلمبرجير ويكونوا اثنينهم طاروا مني.

على فكـرة .. كلامي اللي فوق لا يعني بأن أرامكو شركة سيئة (ولو كانت أرامكو سيئة فما كان هناك أي داعي للحـيرة) ، ولكن لكل شركة طريقة معيّنة في التدريب والشغل ، وعن نفسي ما كنت أشوف مثل شلمبرجير أحـد .. ولكن أيضاً ما أبي أخسر أرامكو في حال ما قبلتني شلمبرجير .. وأيضاً ما أبي أنجبر على أرامكو من قِبل الجامعة وبعدين تكون شلمبرجير قبلـتني وأتحسّف إني قدمت على أرامكو.

في الحقيقة كنت في حيرة عجيبة .. واستشرت أمي (لأنّي ما خبت -بتوفيق الله- في أي موضوع استشرتها فيه) وقالت: قدّم على أرامكو الحين ولا يفوتك باب التقديم وإن قبلتك شلمبرجير بتلقى لها مخرج بإذن الله وكل شيء له استثناء.

أخذت بكلامها وقدمت على أرامكو وقبلتني أرامكو مبدأيّاً ، ثم طلبت مني بعض الوثائق أيضاً وقبلتني قبول نهائي وأرسلت لي 4 رسائل ورسالتين عن طريق عمادة شؤون الطلاب.

قبل رسالتي العمادة .. في شهر مارس 2014 جات شلمبرجير لجامعتـنا لاستقطاب طلاب لـ"السمر" و"الكوآب" ، البعض رفضته من هذاك اليوم والبعض قبلت منه "السي في" وكل واحد حـدد الموعد اللي ينـاسبه للمقـابلة الشخصـية من اليومـين اللي حددوهم.

يوم المقـابلة .. توجهت لمقر الشركة على طريق ابقيق وكان العدد ما شاء الله كبير ، وفي الحقيقة ما كانت مثل المقابلات اللي نعرفها ونشوفها باليوتيوب وغيره (بحيث يكون المتقدم مع موظف أو مجموعة موظفين) ، بل كانت مقابلة شخصية من نوع مختلف ، حيث كان الموظف ينادي بالأسماء للدخول لغرفة الاجتماعات وكان الدخول كل مرة 12 شخص تقريباً بسبب كثرة اللي أجروا معهم مقابلات في هذيك اليومين حيث بلغ عـددهم 185 طالب.

دخلنا لغرفة الاجتمـاعات .. وكان مطلوب من كل واحد فينا يقوم يسوي برزنتيشن سريع مدته 3 دقائق تقريباً ويجاوب فيه ع الأسئلة التالـية:

1)    من أنت؟

2)    وش تخصصك؟ وليه اخترته؟

3)    وش أقوى/أضعف نقطة فيك؟

4)    وليه اخـترت شلمبرجير؟

5)    وليه شلمبرجير تختارك؟ فلو تقدم 100 شخص مثلاً .. ليه تختارك شلمبرجير؟

الحمدلله انتهت المقابلة وأفادنا الموظف أن الاختـيار بيعتمـد على 3 أشياء: "السي في" ، المعدل التراكمي والمقابلة اللي تمّـت ، وأن النتائج بتوصل للجامعة من أسبوع إلى أسبوعين .. والحمدلله كنت متأمّل خير.

بعد المقـابلة بيوم بدأت إجازة نصف الترم الثاني ولا أخفيـكم على أني كنت متأمل خير إلّا أني كنت قلـق بسبب رسايل العمـادة وللحين ما عدّا أسبوع على مقابلة شلمبرجير .. كنت قلق من إجبار الجامعة لي بالمواصلة مع أرامكو (وأرجع وأقول: أرامكو مب سيئة ، ولكنها ما تناسبني "كمـتدرب" إذا ما قارنتها بشلمبرجير ، ولو كانت أرامكو سيئة فما كان هناك أي داعي للحـيرة).

وكانت الوالدة تقول: ما عليك خلّ شلمبرجير تقبلك وإن شاء الله تلقى حل وتتيسر.

ثاني يوم بعد العودة من الإجازة وصلتني رسالة من عمـادة شـؤون الطـلاب تقول:

عـزيري الطـالب

لقد تم قبولك للتدريب الصيفي لدى شركة أرامكو وأيضاً وصلنا اسمك ضمن المقبـولين في شركة شلمبرجير

لضرورة  إتاحة الفرصة لطلاب آخرين نأمل منك تحـديد اختيـارك

في مدة أقصـاها يوم الأربعاء 2 أبريل 2014

إدارة التـدريب

انبسطت واجد وتذكرت كلام الوالـدة -الله يطوّل بعمرها على الطاعة- وكانت أول من بشـرته.

~ نراكم الفصل القادم ~

تويتر: https://twitter.com/ahmadalrajhi2