شلمبرجير # 102

هذا الفصل الثاني من تجربـتي مع شلمبرجير Schlumberger منذ البداية وفيه كلام كثييير وقاعد أكتبه الحين بدون ترتيب وتعديل فلا تشرهون عليّ إن فصّلت كثير .. وقبل لا أبدأ فيه نقطتين بوضحها:

1)    أنا أتعهـد بحقكم عليّ في أني أكون منصـف في كلامي عن الشركة .. فما راح أطلّعها كـ عالـم بمـبي مثل البعـض لأني مُعجب فيها .. وبنفس الوقت ما راح أتذمّـر منها مثل بعض الشـباب اللي للأسف الشـديد حسسونا إنها مكان للكـرف حتى الإجهـاد.

أي نعم: يمكن يكونوا هالشباب طبقوا في أقسـام غير عن قسمـي (Drilling and Measurements) وكانت لهم تجارب مختلفة عن تجربتي ولكن أنا أحكي ما جربته وهو مشابه إلى حد كبـير لما جربه 10 أشخـاص كانوا معي بهالقسـم.

2)    بحاول وأنا أكتب الفصول الجاية أغطّي كل الأسئلة اللي جاتنـي على حسابي في الآسك .. ولكن أرجو من اللي عـنده استفسـار يطرحه هنا بالكومنتس تحت .. لجل تعم الفائدة .. وممكن أصلاً ما يكون عندي جواب على سؤال هالشخص ويشوف سؤاله أحد الشباب اللي تدربوا بالشركة ويرد عليه مبـاشرةً أو عن طريقـي وبذلك تكون الفـائدة أكبر وخصوصاً أن مشاهدات المدونة من بعد السعودية جاية من دول عديدة وأغلبها من أمريكـا (أظن الطلاب المبتعـثين).

كانت بدايتي مع شلمـبرجير كالتالي:

كان من المفـترض إني أتدرب التدريب الصيفي صيف السنة الماضية (2013) ولكن لظروف مرض أخوي وسفري مع الوالـدة لأمريكـا للعلاج حذفت الترم الثاني (اللي قبل الصيفي) واللي المفروض أدرس فيه مواد مُتطلّب دراستها قبل البدء بالتدريب ، مثل ما قلت كان من المخطط أتدرب في صيف 2013 وكنت مستعجل كثير ع الشـركة وأبي أضمن القبول فيها .. فبدأت من الترم الأول (نوفمبر 2012) محاولة الانضـمام لها.

(اللي مستعجل يتجاوز النقاشات اللي تحت لأنها بربرة فاضية واللي ماوراه شيء يقرأ ، بس كتبتها لأن النقاش اللي تحت كان سبب في زيادة ثقتي بنفسي وأن عندي أشياء ونشاطات كويسة في الجامعة كنت معتبرها شيء عادي .. وأحب أقول هنا نصيحة مهمّة جدّاً: صحيح أنه من الجميل والجـيّد تسأل أخوياك المقربين وإخوانك وحتى أمك وأبوك عن عيوبك لجل تعدّلها وتحسّنها وهذا يكون في أي يوم من أيام السنة .. ولكن قبل لا تروح مقابلة شخصية اطلب من المقربين منك يحكوا لك عن ممـيّزاتك وعن الجوانب الجيّدة في شخصيتك لأن صدّقني اللي حولك يشوفوا فيك أشياء جـيّدة أنت ما تشوفها في نفسك .. تماماً مثل العيوب اللي أحياناً تحتاج من ينبهك عليها)

جامعـتنا كل ترم تقيم يوم مفـتوح للتوظيف تتقدم فيه شركات كثـيرة بطلب حضور هاليوم اللي يكون في مبنى المعـارض في الجامعـة لاستقطاب الطلاب ، وطبعاً شلمبرجير أحد الحضور المهمّين بهاليوم.

الزبدة .. رايح لهم مبسـوط أنا ووجهي أبي تدريب صيفي من الحين (شهر نوفمبر2012) والتدريب ما راح يبـدأ إلّا في شهر يونيو 2013.

إلّا وأتحططم يوم يقولي الموظف: وييييييين .. تراك جاي بدري ، تعال الترم الثاني في نفس هالمكان وراح نجي لجلكم يا طلاب "السمر" (الصيفي) ونآخذكم ، الحين جايين بس للتوظيف ولطلاب "الكوآب" (التدريب التعاوني أبو 7 أشهر).

قلت: ممكن تآخذ "السي في" (السيرة الذاتية) طيّب؟

قال: شوف وش كثر الأوراق اللي عندي وأنت "سمر" يعني يمكن تضيع ورقتك أو شيء لأن للحين ما نعرف كم الشركة تحتاج للتدريب الصيفي لأنك جاي بدددري والتدريب في شهر يونيو.

لا أخفيكم جاااااااني إحباااط (وأصلاً مدري ليه هالإحباط .. ماله داعي) .. وأخذت أمشي بين الشركات وما كنت أبي غير هالشركة. 

الزبدة .. مريت من عند شركة وذرفورد (وهي شركة خدمات بترول أيضاً) وقلت خلني أجرّب. عطيته "السي في" بدون أي كلام بس قلت له طالب هندسة بترول وأرجو أنى أحظى بفرصة في الشركة ، وانطميييت (ما أبي أقوله سمر ويقولي بدري). الزبدة الرجال عجبه "السي في" بقوووة وخصوصاً عضوياتي بمجالس الجامعة الاستشارية واختيار معـالي مدير الجامعة لي لأكثر من سنة وأشياء أخرى.

قالّي: يلّا جاهز للمقابلة؟

قلت: ايه .. يلّا

قال: هالترم بتخلص؟

هنا اغرورقت عيني بالدموع ههههههههه وتذكرت النقاش اللي صار بشلمبرجير

وقلت له بنبرة حزينة هههههههه: تراني لسسا طالب وأبي تدريب صيفي

تغيّر وجهه وقال: للأسف ما عندنا برنامج للتدريب الصيفي .. بس "كوآب" وتوظيف

ابتسمت ابتسامة صفراء ومدّيت يدّي بدون أي كلام لجل آخذ "السي في" أخوكم في الله قفلت معه

قال لي: لحظة شوووي

راح لموظف ثاني (وأظن جنسيته هندية ويبدو إنه أعلى منه قريد) وتكلّم معه وهو يشاور بيده عليّ. جاني الموظف الهندي وأخذني بزاوية ودردش معي شوي بخصوص الجامعة ومواضيع ثانية عامّة (يعني كأنها مقابلة بس مب مقابلة) بالنهاية الموظف الهندي عطاني كلمة ما راح أنساها .. قال:

Ahmad, we do not have a program for summer training but we will try to create this position for you because we need people like you.

بعدها قالّي السعودي: شف .. حنا ما عندنا تدريب صيفي ولكن اللي مثلك نبيه فتعال توظّف عندنا وهذا كرت فلان (مدير عام التوظيف) ما نعطيه لأي أحد وهو موصّينا ما نعطيه إلا نادراً وللي يستحق فقط .. فاحتفظ فيه وتعال بعد تخرجك للشركة ومعك هالكرت وإن ضاع منك تعال الشركة وقولهم أبي فلان (عطاني اسمه) وبعطيك كرت بديل ولكن احتفظ بهالكرت الآن ولا تضيّعه لأنه مهم.

الصراحة بعد كلامهم اتنفففففففففففففخ رااسي ههههههههههههههههههه

وقلت الحين راجع لك يا شلمبرجير هههههههههههههه 

وأديور وأرجع شلمبرجير << مححد يمدددحه أبد

ولقيت نفس الشخص موجود وخفت يحط اسمي في البلاك ليست اللي ما يتوظفون بشلمبرجير أبد من نشبتي ههههههههههههه

ولكن أول كان واقف معه واحد ومالقيته ..

وبعدين قابلته وقلت له: ممكن تطّلع ع "السي في" وعجبه كثير وسولف معي لمدة 3 إلى 5 دقايق.

وقالّي: بحتفظ بهـ"السي في" يا أحمد ولكن لا تنسى تجينا الترم الجاي لأن ممكن أنسى وخصوصاً إنه باقي على الموعد أكثر من نصف سنة وتقدّم وبنقبلك إن شاء الله

حسيت بارتياح وقلت له: إن شاء الله

مرّت الأيام وحذفت الترم الثاني فجأة وسافرت أمريكا وهناك فكيت الشريحة السعودية من الجهاز وأخذت رقم أمريكي وقعدت كم شهر لين صار أخوي يقدر يعتمد على نفسـه وتركتهم هناك ورجعت السعودية على الصيفي.

وطبعاً للأسف ما أقدر أتدرب صيفي بسبب إن متطلبات التدريب فاتتني في الترم اللي حذفته (وآمنت إنه خـيرة من ربي وإن ربي الكريم بيكرمني) ، فقلت خلني أستغل هالصيف وأدرس أي مادة ، واخترت مادة من الهندسة الكيميائية (متطلبة) وبديت الدوام بالجامعة للصيف.

ثالث يوم دوام بالصيفي .. يجيني اتصال من هاتف ثابت وما رديت كنت بالكلاس

بحث عنه بـ "النبمر بوك" وطلع تبع شلمـبرجير .. الصدق تعجبت 

دقيت ع الرقم لقيته مشغـول

ركبت الباص ونزلت ع السكـن ورجع الرقم يـدق عليّ .. ورديـت

-نراكم في الفصل الثالث- <<يسوي مثل المسلسلات تشوويق ههههههههههههه

تويتر: https://twitter.com/ahmadalrajhi2