شلمبرجير # 103

هذا الفصل الثـالث من تجربـتي مع شلمـبرجير Schlumberger

مثل ما قلت بالفصل السابق .. مرّت الأيام وحذفت الترم الثاني فجأة وسافرت أمريكا وهناك فكيت الشريحة السعودية من الجهاز وأخذت رقم أمريكي ورجعت السعودية على الصيفي وطبعاً للأسف ما أقدر أتدرب صيفي بسبب إن متطلبات التدريب فاتتني في الترم اللي حذفته (وآمنت إنه خـيرة من ربي وإن ربي الكريم بيكرمني) ، فقلت أستغل الصيف وأدرس أي مادة واخترت مادة من الهندسة الكيميائية (متطلبة) وبديت الدوام بالجامعة للصيف.

ثالث يوم دوام بالصيفي .. يجيني اتصال من هاتف ثابت وما رديت كنت بالكلاس

بحث عنه بـ "النبمر بوك" وطلع تبع شلمـبرجير .. الصدق تعجبت

دقيت ع الرقم لقيته مشغول ، ركبت الباص ونزلت ع السكن ورجع الرقم يـدق عليّ .. ورديت

الموظف: ألو ، أحمد الراجحي؟

أنا: ايه .. سم ، معك أحمد

الموظف: معك فلان من شركة شلمبرجير .. تذكرني يا أحمد؟

قلت: ايه أذكـرك .. شلون ما أذكرك .. يا هلا والله

الموظف: كيفك يا أحمد؟ ووينك الله يهديك؟ ، أتصل عليك جوالك مغلق.

عاد شرحت له ظـروفي اللي سافرت لجلها وإن هناك كان عندي رقم أمريكي ورقمي السعودي مغلق وإني توّ راجع.

سألني: هاه بتدرّب؟

قلت له: ودّي .. ولكن صعب لأن فيه مواد لازم آخذها قبل التدريب الصيفي وفاتتـني يوم إني بأمريكا.

قال: اها .. طيب متى بتدرّب إن شاء الله؟

قلت له: في صـيف 2014 إن شاء الله.

قال: هاه معنا إن شاء الله؟

قلت له: أكيد إن شاء الله إن قبلتوني.

قال: خير إن شاء الله .

الصدق استانست .. وتذكرت العام الماضي يوم اني كنت أسولف مع موظف وذرفورد (اللي ذكرته في الفصل الثاني) وإنه كان السبب اللي خلاني أرجع لشلمبرجير وأعطي "السي في" لهالشخص.

اللي صار فوق كان في الفصل الصيفي (يونيو 2013) وبأتجاوز بسرعة إلى الترم الثاني من العام التالي (فبراير2014) لأن ما أبي أفصّل واجد ، والتفصيل اللي صار فوق وبالفصل الثاني ذكرته لأن هالنقاشات أكسبتني ثقة في نفسي وعرفـتني ما أملك ، وأكـرر وأقول: نصيحة مهمّة جدّاً .. صحيح أنه من الجميل تسأل أخوياك المقربين وإخوانك وحتى أمك وأبوك عن عيوبك لجل تعدّلها وتحسّنها وهذا يكون في أي يوم من أيام السنة .. ولكن قبل لا تروح مقابلة شخصية اطلب من المقربين منك يحكوا لك عن ممـيّزاتك وعن الجوانب الجيّدة في شخصيتك لأن صدّقني اللي حولك يشوفوا فيك أشياء جـيّدة أنت ما تشوفها في نفسك .. تماماً مثل العيوب اللي أحياناً تحتاج من ينبهك عليها.

في النصف الأول من الترم الثاني .. كان بداية موسم التقـديم على الشركـات وكان افـتتاح الموسم بشركة "أرمكـو" ، فقبل بدء التقديم على شلمبرجير بقرابة شهر كان بيقفل التقديم على أرامكو .. وللأسف كان من ضمن شروط الجامعة إن اللي ينقبل في أرامكو لازم يكمّل معها وما راح تقبل الجامعة انتقـاله إلى شركة أخرى للـتدريب.

فوق قلت كلمة "للأسف" .. وقلتها لأن ما كنت أبي أتدرب في أرامكو ولكن أيضاً ما أبي أخسرها في حال عدم قبولي في شلمبرجير ويكونوا اثنينهم طاروا مني.

على فكـرة .. كلامي اللي فوق لا يعني بأن أرامكو شركة سيئة (ولو كانت أرامكو سيئة فما كان هناك أي داعي للحـيرة) ، ولكن لكل شركة طريقة معيّنة في التدريب والشغل ، وعن نفسي ما كنت أشوف مثل شلمبرجير أحـد .. ولكن أيضاً ما أبي أخسر أرامكو في حال ما قبلتني شلمبرجير .. وأيضاً ما أبي أنجبر على أرامكو من قِبل الجامعة وبعدين تكون شلمبرجير قبلـتني وأتحسّف إني قدمت على أرامكو.

في الحقيقة كنت في حيرة عجيبة .. واستشرت أمي (لأنّي ما خبت -بتوفيق الله- في أي موضوع استشرتها فيه) وقالت: قدّم على أرامكو الحين ولا يفوتك باب التقديم وإن قبلتك شلمبرجير بتلقى لها مخرج بإذن الله وكل شيء له استثناء.

أخذت بكلامها وقدمت على أرامكو وقبلتني أرامكو مبدأيّاً ، ثم طلبت مني بعض الوثائق أيضاً وقبلتني قبول نهائي وأرسلت لي 4 رسائل ورسالتين عن طريق عمادة شؤون الطلاب.

قبل رسالتي العمادة .. في شهر مارس 2014 جات شلمبرجير لجامعتـنا لاستقطاب طلاب لـ"السمر" و"الكوآب" ، البعض رفضته من هذاك اليوم والبعض قبلت منه "السي في" وكل واحد حـدد الموعد اللي ينـاسبه للمقـابلة الشخصـية من اليومـين اللي حددوهم.

يوم المقـابلة .. توجهت لمقر الشركة على طريق ابقيق وكان العدد ما شاء الله كبير ، وفي الحقيقة ما كانت مثل المقابلات اللي نعرفها ونشوفها باليوتيوب وغيره (بحيث يكون المتقدم مع موظف أو مجموعة موظفين) ، بل كانت مقابلة شخصية من نوع مختلف ، حيث كان الموظف ينادي بالأسماء للدخول لغرفة الاجتماعات وكان الدخول كل مرة 12 شخص تقريباً بسبب كثرة اللي أجروا معهم مقابلات في هذيك اليومين حيث بلغ عـددهم 185 طالب.

دخلنا لغرفة الاجتمـاعات .. وكان مطلوب من كل واحد فينا يقوم يسوي برزنتيشن سريع مدته 3 دقائق تقريباً ويجاوب فيه ع الأسئلة التالـية:

1)    من أنت؟

2)    وش تخصصك؟ وليه اخترته؟

3)    وش أقوى/أضعف نقطة فيك؟

4)    وليه اخـترت شلمبرجير؟

5)    وليه شلمبرجير تختارك؟ فلو تقدم 100 شخص مثلاً .. ليه تختارك شلمبرجير؟

الحمدلله انتهت المقابلة وأفادنا الموظف أن الاختـيار بيعتمـد على 3 أشياء: "السي في" ، المعدل التراكمي والمقابلة اللي تمّـت ، وأن النتائج بتوصل للجامعة من أسبوع إلى أسبوعين .. والحمدلله كنت متأمّل خير.

بعد المقـابلة بيوم بدأت إجازة نصف الترم الثاني ولا أخفيـكم على أني كنت متأمل خير إلّا أني كنت قلـق بسبب رسايل العمـادة وللحين ما عدّا أسبوع على مقابلة شلمبرجير .. كنت قلق من إجبار الجامعة لي بالمواصلة مع أرامكو (وأرجع وأقول: أرامكو مب سيئة ، ولكنها ما تناسبني "كمـتدرب" إذا ما قارنتها بشلمبرجير ، ولو كانت أرامكو سيئة فما كان هناك أي داعي للحـيرة).

وكانت الوالدة تقول: ما عليك خلّ شلمبرجير تقبلك وإن شاء الله تلقى حل وتتيسر.

ثاني يوم بعد العودة من الإجازة وصلتني رسالة من عمـادة شـؤون الطـلاب تقول:

عـزيري الطـالب

لقد تم قبولك للتدريب الصيفي لدى شركة أرامكو وأيضاً وصلنا اسمك ضمن المقبـولين في شركة شلمبرجير

لضرورة  إتاحة الفرصة لطلاب آخرين نأمل منك تحـديد اختيـارك

في مدة أقصـاها يوم الأربعاء 2 أبريل 2014

إدارة التـدريب

انبسطت واجد وتذكرت كلام الوالـدة -الله يطوّل بعمرها على الطاعة- وكانت أول من بشـرته.

~ نراكم الفصل القادم ~

تويتر: https://twitter.com/ahmadalrajhi2

شلمبرجير # 102

هذا الفصل الثاني من تجربـتي مع شلمبرجير Schlumberger منذ البداية وفيه كلام كثييير وقاعد أكتبه الحين بدون ترتيب وتعديل فلا تشرهون عليّ إن فصّلت كثير .. وقبل لا أبدأ فيه نقطتين بوضحها:

1)    أنا أتعهـد بحقكم عليّ في أني أكون منصـف في كلامي عن الشركة .. فما راح أطلّعها كـ عالـم بمـبي مثل البعـض لأني مُعجب فيها .. وبنفس الوقت ما راح أتذمّـر منها مثل بعض الشـباب اللي للأسف الشـديد حسسونا إنها مكان للكـرف حتى الإجهـاد.

أي نعم: يمكن يكونوا هالشباب طبقوا في أقسـام غير عن قسمـي (Drilling and Measurements) وكانت لهم تجارب مختلفة عن تجربتي ولكن أنا أحكي ما جربته وهو مشابه إلى حد كبـير لما جربه 10 أشخـاص كانوا معي بهالقسـم.

2)    بحاول وأنا أكتب الفصول الجاية أغطّي كل الأسئلة اللي جاتنـي على حسابي في الآسك .. ولكن أرجو من اللي عـنده استفسـار يطرحه هنا بالكومنتس تحت .. لجل تعم الفائدة .. وممكن أصلاً ما يكون عندي جواب على سؤال هالشخص ويشوف سؤاله أحد الشباب اللي تدربوا بالشركة ويرد عليه مبـاشرةً أو عن طريقـي وبذلك تكون الفـائدة أكبر وخصوصاً أن مشاهدات المدونة من بعد السعودية جاية من دول عديدة وأغلبها من أمريكـا (أظن الطلاب المبتعـثين).

كانت بدايتي مع شلمـبرجير كالتالي:

كان من المفـترض إني أتدرب التدريب الصيفي صيف السنة الماضية (2013) ولكن لظروف مرض أخوي وسفري مع الوالـدة لأمريكـا للعلاج حذفت الترم الثاني (اللي قبل الصيفي) واللي المفروض أدرس فيه مواد مُتطلّب دراستها قبل البدء بالتدريب ، مثل ما قلت كان من المخطط أتدرب في صيف 2013 وكنت مستعجل كثير ع الشـركة وأبي أضمن القبول فيها .. فبدأت من الترم الأول (نوفمبر 2012) محاولة الانضـمام لها.

(اللي مستعجل يتجاوز النقاشات اللي تحت لأنها بربرة فاضية واللي ماوراه شيء يقرأ ، بس كتبتها لأن النقاش اللي تحت كان سبب في زيادة ثقتي بنفسي وأن عندي أشياء ونشاطات كويسة في الجامعة كنت معتبرها شيء عادي .. وأحب أقول هنا نصيحة مهمّة جدّاً: صحيح أنه من الجميل والجـيّد تسأل أخوياك المقربين وإخوانك وحتى أمك وأبوك عن عيوبك لجل تعدّلها وتحسّنها وهذا يكون في أي يوم من أيام السنة .. ولكن قبل لا تروح مقابلة شخصية اطلب من المقربين منك يحكوا لك عن ممـيّزاتك وعن الجوانب الجيّدة في شخصيتك لأن صدّقني اللي حولك يشوفوا فيك أشياء جـيّدة أنت ما تشوفها في نفسك .. تماماً مثل العيوب اللي أحياناً تحتاج من ينبهك عليها)

جامعـتنا كل ترم تقيم يوم مفـتوح للتوظيف تتقدم فيه شركات كثـيرة بطلب حضور هاليوم اللي يكون في مبنى المعـارض في الجامعـة لاستقطاب الطلاب ، وطبعاً شلمبرجير أحد الحضور المهمّين بهاليوم.

الزبدة .. رايح لهم مبسـوط أنا ووجهي أبي تدريب صيفي من الحين (شهر نوفمبر2012) والتدريب ما راح يبـدأ إلّا في شهر يونيو 2013.

إلّا وأتحططم يوم يقولي الموظف: وييييييين .. تراك جاي بدري ، تعال الترم الثاني في نفس هالمكان وراح نجي لجلكم يا طلاب "السمر" (الصيفي) ونآخذكم ، الحين جايين بس للتوظيف ولطلاب "الكوآب" (التدريب التعاوني أبو 7 أشهر).

قلت: ممكن تآخذ "السي في" (السيرة الذاتية) طيّب؟

قال: شوف وش كثر الأوراق اللي عندي وأنت "سمر" يعني يمكن تضيع ورقتك أو شيء لأن للحين ما نعرف كم الشركة تحتاج للتدريب الصيفي لأنك جاي بدددري والتدريب في شهر يونيو.

لا أخفيكم جاااااااني إحباااط (وأصلاً مدري ليه هالإحباط .. ماله داعي) .. وأخذت أمشي بين الشركات وما كنت أبي غير هالشركة. 

الزبدة .. مريت من عند شركة وذرفورد (وهي شركة خدمات بترول أيضاً) وقلت خلني أجرّب. عطيته "السي في" بدون أي كلام بس قلت له طالب هندسة بترول وأرجو أنى أحظى بفرصة في الشركة ، وانطميييت (ما أبي أقوله سمر ويقولي بدري). الزبدة الرجال عجبه "السي في" بقوووة وخصوصاً عضوياتي بمجالس الجامعة الاستشارية واختيار معـالي مدير الجامعة لي لأكثر من سنة وأشياء أخرى.

قالّي: يلّا جاهز للمقابلة؟

قلت: ايه .. يلّا

قال: هالترم بتخلص؟

هنا اغرورقت عيني بالدموع ههههههههه وتذكرت النقاش اللي صار بشلمبرجير

وقلت له بنبرة حزينة هههههههه: تراني لسسا طالب وأبي تدريب صيفي

تغيّر وجهه وقال: للأسف ما عندنا برنامج للتدريب الصيفي .. بس "كوآب" وتوظيف

ابتسمت ابتسامة صفراء ومدّيت يدّي بدون أي كلام لجل آخذ "السي في" أخوكم في الله قفلت معه

قال لي: لحظة شوووي

راح لموظف ثاني (وأظن جنسيته هندية ويبدو إنه أعلى منه قريد) وتكلّم معه وهو يشاور بيده عليّ. جاني الموظف الهندي وأخذني بزاوية ودردش معي شوي بخصوص الجامعة ومواضيع ثانية عامّة (يعني كأنها مقابلة بس مب مقابلة) بالنهاية الموظف الهندي عطاني كلمة ما راح أنساها .. قال:

Ahmad, we do not have a program for summer training but we will try to create this position for you because we need people like you.

بعدها قالّي السعودي: شف .. حنا ما عندنا تدريب صيفي ولكن اللي مثلك نبيه فتعال توظّف عندنا وهذا كرت فلان (مدير عام التوظيف) ما نعطيه لأي أحد وهو موصّينا ما نعطيه إلا نادراً وللي يستحق فقط .. فاحتفظ فيه وتعال بعد تخرجك للشركة ومعك هالكرت وإن ضاع منك تعال الشركة وقولهم أبي فلان (عطاني اسمه) وبعطيك كرت بديل ولكن احتفظ بهالكرت الآن ولا تضيّعه لأنه مهم.

الصراحة بعد كلامهم اتنفففففففففففففخ رااسي ههههههههههههههههههه

وقلت الحين راجع لك يا شلمبرجير هههههههههههههه 

وأديور وأرجع شلمبرجير << مححد يمدددحه أبد

ولقيت نفس الشخص موجود وخفت يحط اسمي في البلاك ليست اللي ما يتوظفون بشلمبرجير أبد من نشبتي ههههههههههههه

ولكن أول كان واقف معه واحد ومالقيته ..

وبعدين قابلته وقلت له: ممكن تطّلع ع "السي في" وعجبه كثير وسولف معي لمدة 3 إلى 5 دقايق.

وقالّي: بحتفظ بهـ"السي في" يا أحمد ولكن لا تنسى تجينا الترم الجاي لأن ممكن أنسى وخصوصاً إنه باقي على الموعد أكثر من نصف سنة وتقدّم وبنقبلك إن شاء الله

حسيت بارتياح وقلت له: إن شاء الله

مرّت الأيام وحذفت الترم الثاني فجأة وسافرت أمريكا وهناك فكيت الشريحة السعودية من الجهاز وأخذت رقم أمريكي وقعدت كم شهر لين صار أخوي يقدر يعتمد على نفسـه وتركتهم هناك ورجعت السعودية على الصيفي.

وطبعاً للأسف ما أقدر أتدرب صيفي بسبب إن متطلبات التدريب فاتتني في الترم اللي حذفته (وآمنت إنه خـيرة من ربي وإن ربي الكريم بيكرمني) ، فقلت خلني أستغل هالصيف وأدرس أي مادة ، واخترت مادة من الهندسة الكيميائية (متطلبة) وبديت الدوام بالجامعة للصيف.

ثالث يوم دوام بالصيفي .. يجيني اتصال من هاتف ثابت وما رديت كنت بالكلاس

بحث عنه بـ "النبمر بوك" وطلع تبع شلمـبرجير .. الصدق تعجبت 

دقيت ع الرقم لقيته مشغـول

ركبت الباص ونزلت ع السكـن ورجع الرقم يـدق عليّ .. ورديـت

-نراكم في الفصل الثالث- <<يسوي مثل المسلسلات تشوويق ههههههههههههه

تويتر: https://twitter.com/ahmadalrajhi2

شلمبرجير # 101

Schlumberger

شلمبرجير

هنا سأعرض تجربتي مع شـركة " شلمبرجـير " وستكون باللهجة السعودية البيضاء (العاميّة) حتى تكون هناك أريحيّة أكبر في الكتابة والقراءة .. وستكون على عـدّة فصـول

في البداية نتكلم بمعلومات سريعة عن الشركة وبشكل مبسط:

شركة "شلمبرجير" هي شركة خدمات بـترول ، بمعنى أنها تقدّم خدمات في مجال استخراج وصناعة النفط ولكنها لا تملك البترول.

فعلى سبيل المثال عندنا في السعودية اللي يملك البترول هي شركة "أرمكـو" (الحكومة) ، وفيه أكثر من شركة تقدم خدمات لاستخراج البترول وصيانة المكامن وغيرها من الخدمات في صناعة النفط مثل: شلمبرجير ، وذرفـورد ، بيكرهيوز ، هاليبورتن ، وغيرها من الشركات وهي أشبه ما تكون بالمقاول ومؤسسات المقاولات اللي تبني وتجهز لك البيت ، وأنت تملك الأرض والبيت (تماماً مثل أرامكو هي مالكة الأرض والبترول).

وغالباً ما تكون شركات خدمات البترول .. شركات عالميّة

فـ"شلمبرجير" شركة عالميّة وتخدم في أكـثر من 85 دولة حول العالم ومقرّها الرئـيس في فرنسـا ، وبها أكثر من 120 ألف موظف وهي شركة متنوعة الجنسيات وبها أكثر من 140 جنسـية. 

وهالشيء في الحقيقة جدّاً رائع .. وفرصة للتعـرف على ثقـافات شعوب دول العالم اللي سبق وإنك قريت عنهم وتقارن ما سمعته أو ما قرأته عنهم بما تعايشه وتشوفه عليهم ، وهالشيء كان جدّاً ممتع بالنسبة لي .. بل هذا ثاني أهم سبب لسفري بعد رغبة الترفـيه وتغـيير الجو طبـعاً.

يوجد في الشركة 3 أنواع من العقود للتوظيف (عقد عالمي وعقد لدول مجلس التعاون الخليجي وعقد محلّي) وكل عقد يختلف عن الثاني بالمميزات والسلبيات ونظام الاجازات وطبعاً الرواتب اللي أعلاها العالمي .. ورغم تجميعي لبعض المعلومات من الخريجين اللي قدّموا ع الشركة ومن بعض موظفيها الجدد والقدامى إلّا أني ما أبي أفصّل بموضوع العقـود لأن ما أبي أتفلسف بشيء مب مـلمّ فيه بشكل كامل أو بالأصح ما جربته .. وادعولي أتوظف بالشركة بعد التخرج ومالكم إلّا من سدح لكم كل شيء عن التوظيف هههههههههه.

محدّثكم طالب هـندسة بـترول بجامعـة المـلك فهـد للبـترول والمعـادن وتجربتي مع الشركة كانت تدريب صيـفي بعقد مـدته 53 يوم من 9 يونيو وحتى 31 يوليو ، غير أني طلبت تمديد فترة تدريبي زيادة وتم التمديد لمدة 21 يوم ، فأصبحت مدة عقدي 74 يوم.

تدريبي كان تحت مسمّى "مهندس حقـول النفط والغاز" (الحقل هو مكان الحفر) ولكن في الحقـيقة شغلي لفـترة طويلة بل أغلـبه كان في مقـر الشركـة في الخـبر نظراً لقلّة أعمال الحـفر في شهر رمضـان ، فلذلك كانت الأولوية لزيارة "الفيلد" (اللي هو الحقل) هي لطلاب التدريب الصيفي اللي فـترة تدريبهم 8 أسابيع تقريبـاً قبل طلاب التدريب التعـاوني اللي فـترة تدريبهم تمـتد لقرابة 7 أشهـر .. غير أني كنت آخر طـلاب التدريب الصـيفي اللي راحوا "الفيلد" نظراً لأني مـددت فـترة تدريبـي (راح أذكر هالشيء بعدين) فعندي فرصـة أروح بعد ما يرجعـوا.

-أوافيكم بالمـزيد قريباً-

تويتر: https://twitter.com/ahmadalrajhi2