كلمات لطلاب الثانوي والمستجدين في الجامعات

السـلام عليـكم ورحمـة الله وبركـاته

إلى إخوتي طلاب الثـانوي .. والمستجدين بالجامعات والكليّات وطلاب السنوات الأولى

هذه مجموعة كلمات ونصائح أقدمها لكم .. وأنا حقـيقةً لا أرقى لأن أكون ناصح أو موجّـه وإنما هي مجرد نصائح من تجـارِب ومن أشياء لاحظتها على زملائي .. لا أكثر ، وأرجو أن تقبلوها منّي .. وعسى أنها تفيد ولو بالقليل:

    1) غالباً في بعض الجامعات (ودائماً في الجامعات المتميّزة كجامعة البترول) يكون مستوى الطلاب اللي معك مقارب لك ، بمعنى (ولنمثّل بجامعة البترول): لو أنك كنت "دافور" بالثانوي ودخلت البترول ، فاللي دخلوا معك أيضاً دوافـير. فدرجاتكم في الثانوي كانت متقاربة جدّاً ، ولكن في الجامعة بتظهر الفروقات الفردية بينكم بشكل أكبر مما كانت عليه في الثانوي ، والسبب أن الأسئلة أصبحت لمجموعة طلاب كانوا من أفضل طلاب الثانوي.

فلذلك: لا تخلي شطـارتك بالثانوي تدفعك إلى أنك ما تذاكر كويس في الجامعة ، بل يبي لك تبذل جهد أكبر حتى تتميز عن زملائك اللي كانوا شطّار مثلك.

    2) اهتم كثير في اختيار أول شلّة لك بالجامعة ، الصاحب ساحب - بمعنى الكلمة - وخصوصاً إذا انتقلت لمجتمع جديد.

    3) كثير طلاب ما كانوا يدخنوا وبدأوا التدخين في أول سنة بالجامعة في البريكات الـ 10 دقايق ، فانتبه من هذه المشكلة ، واعرف المكان الصحيح اللي تقضي فيه البريك ومع من.

    4) كثير تخصصات تكون دراستها بالانجلش ، لا تنزعج من هذا الشيء في أول أيامك ، بل اقعد واقرأ كلمة كلمة وصدّقني راح تتعلم ، ولا تستحي تترجم كل كلمة ما تعرفها.

    5) كل اللي معك نفس تعليمك ، كلكم جايين من التعليم العام ، وكلكم درستوا نفس المناهج بالثانوي ، فلا تحسب أنك أسوأ الطلاب أول أسبوع .. انتبه من هذا الشعـور

    6) إن كنت بتدرس في جامعة بعيدة عن أهلك وبتسكن بسكن الجامعة (أو سكن مع شباب في شقة) ، ترى زميلك بالسكن بيكون له تأثير كبير عليك فلا تستـهين باختياره ، واحـرص !

    7) الواجبات ثم الواجبات ثم الواجبات مهما كثرت ، لا تسحب عليها ولا تنقل الحل (إلّا في أسوأ الظروف).

    8) بالجامعة محد راح يتابع وراك (غيابك ، حضورك ، واجباتك) ، ولكن كلّه مسجَّل عليك وراح تشوفه في آخر يوم ، وممكن يكون باقي لك درجة وحدة بس حتى تأخذ "القـريد" اللي بعده ، وتكون هذه الدرجة ضاعت بسبب غياب أو هموورك تكاسلت تسويه أو لأن مزاجك ما كان رايق في ذاك اليوم.

    9) معدّلك ببداية الجامعة تقدر تشبهه بـ"الصلصـال" ، تلعب فيه لعب ، يعني تقدر ترفعه بسرعة وتنزله "القاع" بسرعة ، فارفعه قد ما تقدر ، وآخر أترامك بالجامعة راح يكون رفع المعدل صعب وهدمه كذلك ، فقـوّيه وابنيه تمام في أول 3 سنين ، واهتم طبعاً باقي السنين .. بس أول سنينك لها معاملة خاصّة وتركيز أكبر.

    10) المعدّل ليس كل شيء ولكـنه من أهم الأشياء ، فاحرص على المشاركة في الأنشطة بعد بناء معدلك.

    11) الأنشطة اللاصفـية راح تضيف لك وتميّزك عن اللي كل حياته من قاعة الدراسة لغرفته ومن غرفته لقاعة الدراسة ، وبتتذكر كلامي هذا لو قُـدِّر أنكم دخلتم نفس الشركة وكنتم بقروب عمل واحد ، وقتها راح تلاحظ تمـيّزك عنه.

    12) بِغَضّ النظر عن حالتك المـاديّة .. إن قدرت تشتغل بعد سنتين أو ثلاث من بداية الدراسة فاشتغل وادرس (راح تستفيد كثيييير) ، ولكن تذكر: دراستك أولى من شغلك ، فلا تخلي عملك يؤثـر على تحصيلك الدراسـي.

    13) إن كان متاح في جامعتك المشاركة في المجالس الاستـشارية واللّجان التنـفيذية فلا تتـردد أبداً بالمشاركة فيها ، المجالس الاستشارية واللجان التنفيذية راح تعلمك كيف تتعامل مع المسؤول وكيف تتخذ القرار ، وأيضاً راح تتوسع نظـرتك لتشمل زوايا أخرى لكثير من القرارات واللي ما كنت تنـظر لها إلا من زاوية الطالب فقط.

    14) بعض الجامعات - كجامعة البترول - يكون لكل طالب "أدفايزر" من الدكاترة ، يساعده في وضع الخطة الدراسية وفي أشياء أخرى ، نصيحة: لا تهمل زيارة أدفايزرك واستفـد منه مهما كانت قلّة الفايدة اللي بتطلع بها منه.

    15) أيضاً استـعن بمن هم أسبق منك في التخصص في وضع الخطة الدراسية ، حتى لا تتأخر عن التخرج بسبب اللخبطة ، ومن تجارِب كثيرة أقدر أقولك: بعض الطلاب القدامى يكونوا أدرى من الدكاترة بمدى صعـوبة بعض المواد ، فلذلك استعـن أيضاً بالشباب اللي قبلك.

    16) كثير طلاب كانوا قبل الجامعة لا لهم ولا عليهم ، وبمجرد أن دخلوا الجامعة صنّـفوا أنفسهم فكرياً ، بل الكثير منهم صار يُصنِّف ويُصنَّف ويجتهد في ذلك ، فتجنب هذه الجماعات والتـيّـارات اللي تذكرك بأوروبا في العصور المظلمة ، وركّز على دراستك وتطوير مهاراتك ، والتزم بثوابت دينك ومراتبه الثلاث وأركانهم وتعبّد بكتاب الله أصرف لك من بعض الكتب اللي تدور بين بعض الطلاب ، وخلك بعيد عن هذه الجماعات (اللي عادةً ما تكون في الأندية).

    17) اكتب المحاضرات بنفسك .. بخط يدك مع الدكتور ، ولا تقعد تصورها بجوالك من السبورة أو تنقلها بعدين من زملائك ، فيه فرق كبير بين نتائج الطريقتين.

   18) بعض الدكـاترة يقولوا معلومات وقت الشـرح من خارج الكتاب وممكن تجيك بالاختبارات ، فانتبه لها ودوّنهـا في دفـترك ، ولا تعتـمد على ذاكرتك.

    19) ابدأ من أول الترم بعمل ملف خاص لكل مادة (محاضرات/واجبات/مشاريع/تقارير) ، ويكون هذا الملف كالمرجع لك ، وممكن تفيد فيه من يجي بعـدك.

     20) اختيار تخصصك يعتمد على عدة معايير مثل:

-         حبك للتخصص

-         سهولته بالنسبة لك

-         سوق العمل وقت تخرجك

-         خطة حياتك

-         تفكير زوجـتك (خصوصاً هندسة البترول)

-         الراتب

-         المكـانة الاجتماعـيّة اللي ترجوها لنفسك ، وغيرها.

    21) أبداً أبداً أبداً لا تدخل تخصص عشان أمك وأبوك وأنت ما تحبه ، احـذر ! ، وأقنعهم بالتي هي أحسن أن دخولك لتخصص ما ترغب فيه راح يؤثـر عليك سلبيّـاً ، وصـدقني ما راح يرضون لك المضـرّة لو شرحت لهم وضعك بوضوح.


22) فوق قلت "أبداً لا تدخل تخصص عشان أمك وأبوك وأنت ما تحبه" ، غنيّ عن الذِكر أنك أيضاً لا تدخل تخصص عشان مجموعة من أصدقائك أو أقاربك (من أولاد عمّك أو خالك) دخلوا هذا التخصص أو ذاك.
وفي المقابل أيضاً لا تتـرك تخصص أنت حابّه -وانطبقت عليه جميع المعـايير اللي فوق- لأنك تواجه نوع من الحرج بسبب وجهة نظر أقاربك فيه.
هذه دراستك أنت ، شهادتك أنت ، حياتك أنت ، وأنت اللي تحددها وأنت اللي ترسم طريقك .. أما اللي حولك فممكن تستعين فيهم باستشارة أو رأي .. لا أكـثر ، أمّا التحكّـم أو التأثـير الذي يصل إلى حد التحكّم .. فـ لا 

   23) استغل وقت فراغك في السنة التحضيرية في التعرف على التخصصات (من الطلاب القدامى والدكاترة).

   24) تذكر أن تخصصك راح يكون له تأثير (كبير أو محدود) على حياتك لـ 40 سنة قدام ، فاحرص على الاختيار !

هذا ما طـرى على بالي ، وإن حضـر شيء جديـد كتبته، والله يوفّـق الجمـيع ويرزقـكم ما ترجـون.

ولأي استفـسار .. حاضر باللي أعرفه ، وهذه هي وسائل التواصل:

تويــتر: https://twitter.com/ahmadalrajhi2 (للرد السريع)

لينكدن: https://www.linkedin.com/in/ahmadalrajhi2

أخوكـم/ أحمـد الراجحـي