أحمـد الراجحـي: شلمبرجير # 105

هذا الفصل الخامس من تجربـتي مع شلمـبرجير Schlumberger

وأعتذر بشـدّة على التأخر، واعتذاري هذا لغير طلاب جـامعتنا ، أما طلاب جـامعتنا فأكيد عـاذريني لأنهم عارفين السبب وهو فـترة الاختـبارات اللي مرينا فيها عسى الله يوفق الجميع.

بعد ما مشى المهنـدس غـسّان مـرداد استكملنا باقي الأوراق وتم تعـريف كل واحد بالمسـؤول في قسمه واللي لازم يقـابله بكرا ، وانتهى هذاك اليـوم بتوزيع الــ Coverall و الـ Helmet.

هذا هو الــ Coverall >>>

أما باقي أغراض السيفتي تآخذهم من محل التميمي بعد ما أرسلت الشركة لهم اسمك

مثل ما قلت لكم طلع قسمـي Drilling & Measurements

والتقـينا بمسـؤولنا المبـاشر في القسـم ، وكان شخص خلوق ومتفاهم وواعي ولله الحمـد.

أخذ فينا جولـة في القسـم وعرفـنا على مسـؤولي الوحـدات اللي بنشتغل معهم فيما بعـد.

طبعـاً يتّضح جليّاً لكم وظيفة هالقسـم من اسمه وهي تقديم خدمتي الحفـر والقياسات (إن جاز لنا الترجمة) للعميل ، والعميل في السعـودية هو أرامكو مثل ما قلنا في الفصـل الأول من المـدونة.

قبل لا نتكلم بشيء من التفصـيل بخصوص هالقسـم بيكون من الأفضـل أن نعطي لمحة سريعة عن آبار البـترول وأهم العمليات اللي تتم فيها لعلّ هالشيء يفـيد طلاب التخصصـات الأخرى (غير هندسة البـترول).

بعد ما يتم التأكد من وجود البـترول في مكـان ما ، يعملوا فجوة في الأرض بأداة وزنها كبير (ككبس) ثم تبدأ عملـية الحفـر بقطر (Diameter) كبير تقريباً ويسمونه الـ Open Hole ، وبعد كذا يصغر هالقطر مع زيادة العمق ومع كل زيادة يصير فيه Casing (عملية تغليف إن جاز لنا الترجمة) وطبعاً يختلف طول القطر من بئر إلى بئر حسب الخطة لكل بئر.

ونضرب مثال على ذلك ..

فمثلاً أحد الآبار يكون القطر الأول فيه تقريباً 26 انش يعني قطـر الحفـرة قرابة الـ66 سم ، فيتم الحفر بمقاس 26 انش لمسـافة 700 قدم مثلاً ، وبعد كذا تتم عملية تغليف للجدار يسموها Casing وبهالعملية يصغر قطر الحفرة من 26 انش إلى 22 انش مثلاً ، بعد كذا نستأنف الحفر بقطر أصغر من قطر الـ Casing ويكون طول القطر الجديد مثلاً 20 انش ، ويتم مواصلة الحفر بهالقطر لمسافة 2000 قدم مثلاً ، وبعدها تتم عملية Casing وبهالعملية يصغر قطر الحفرة من 20 انش إلى 17 انش مثلاً ، وبعد كذا نستأنف الحفر بقطر أصغر من قطر الـ Casing ويكون طول القطر الجديد 15 انش وعلى هالطريقة وحسب خطة الحفر اللي حددت القياسات. والصورة بالأسفل عبارة عن رسم توضيحي لوضعية أقطار الحفر وكيف إنها تصغر مع زيادة العمق.

طبعاً مو كل الآبـار عمـودية مثل ما يظن البعـض ، بل فيه الآبار الأفقية كما في الصورة التالـية

نرجع الحـين لموضوع عملي وشغلي كمهندس في قسم الـ Drilling & Measurements.

وقلت لكم فوق: يتّضح جليّاً لكم وظيفة هالقسـم من اسمه وهي تقديم خدمتي الحفـر والقياسات (إن جاز لنا الترجمة) للعميل والعميل في السعـودية هو أرامكو مثل ما قلنا في الفصـل الأول من المـدونة.

شغلي في الشركة كان في الخدمة الثانية وهي خـدمة الـ Measurements

ومسمى شـاغل هالوظيـفة هو MWD Engineer

وMWD هي اختصار لـ Measurements While Drilling وترجمتها القياس أثـناء الحفـر.

أخذ القـياسات أثـناء الحفـر وظيفـة مهمّة جدّاً جدّاً جدّاً ، قد يترتب الخطأ فيها خسـائر تصـل للمـلايين بل ربما حدوث انفجـارات وخسـائر مـادية وبشـرية فـادحة.

وبما أن شغلي كـ MWD Engineer تجلّى بشكل أكـبر يوم كنت في الفيلـد (الحقل) فأفضل نؤجل التفـصيل في هالعمـل إذا وصلـنا لجزء زيارتي للفيـلد.

وخلينا الحين نتكلم عمّا قبل الفيـلد

قبل الفيـلد اشتغـلت في مقـر الشركـة بالخـبر وتنقـلت في عمـلي بين أكـثر من وحـدة من وحـدات قسم الـ Drilling & Measurements ، وحقـيقةً استفـدت كثـير من التنـوّع اللي صـار.

فمنذ أول يوم لي في القسـم تعلّمت على برنـامج تستخدمه شلمـبرجير واسمه ماكس ويل ولأني ما أدري هل يحق لي أتكلم عن هالبرنـامج أو ما يجـوز إني أتكـلم عنه .. فلذلك ما راح أتكلم عنه.

انتقـلت بعد كذا للعمـل في معمل اسمه الـ Surface Lab ، وفي هالمعمـل يتم برمجة برنامج الماكس ويل وتحضير وحدة العمل الـ Unit (بحط صورة مشابهة لها) اللي بـتروح الفيـلد واللي يجلس فيها ويستخدمها مهندس الـ MWD والتشـييك على كل مقتنـياتها ابتداءً من أجهزة الكمبيوتر والمكيفات والعدّة والكراسي وحتى شنطة الإسعافات الأولـيّة وأشياء واجد ، بالإضـافة إلى تحضـير وتجربة أجهزة الاستشعار اللي تتركب في عمود الحفر لقراءة المعلومات أثناء الحفـر واللي راح أتكلم عنها بشيء من التفصيل في جزئية زيارة الفيـلد.